بٹگرام کے معروف سیاستدان اور سماجی شخصیت جاوید خان تھاکوٹ نے بی ایس ایل فرنچائز کوزہ بانڈہ یونائیٹڈ کیلئے ایک شاندار خوشخبری کا اعلان کیا ہے، جس نے کھیل کے شائقین اور ٹیم کے کھلاڑیوں کے دل جیت لیے ہیں۔ جاوید خان تھاکوٹ نے مقامی سطح پر کھیلوں کی سرگرمیوں کیلئے مشہور سوشل میڈیا پیج KD Battagram کے ایک لائیو میچ کے دوران کمنٹس میں اظہارِ خیال کرتے ہوئے کہا کہ "اگر کوزہ بانڈہ یونائیٹڈ بی ایس ایل ٹورنامنٹ جیت گئی تو میں ٹیم کے اعزاز میں پرل کانٹینینٹل (پی سی) ہوٹل میں ایک شاندار دعوت کا اہتمام کروں گا۔”
اس اعلان کے بعد کوزہ بانڈہ یونائیٹڈ کے کپتان، ٹیم کے کھلاڑیوں اور فرنچائز مالکان سمیت بی ایس ایل انتظامیہ نے جاوید خان تھاکوٹ کا تہہ دل سے شکریہ ادا کیا۔ سوشل میڈیا پر یہ خبر جنگل کی آگ کی طرح پھیل گئی، اور کوزہ بانڈہ کے شائقین نے جاوید خان کے اس جذبے کو خوب سراہا۔
جاوید خان تھاکوٹ بٹگرام کی سیاسی اور سماجی زندگی میں اہم مقام رکھتے ہیں، اور ان کا یہ اعلان مقامی سطح پر نہ صرف ٹیم کی حوصلہ افزائی کا باعث بنے گا بلکہ بٹگرام کے نوجوانوں میں کھیلوں کی دلچسپی کو بھی مزید فروغ دے گا۔ کوزہ بانڈہ یونائیٹڈ پہلے ہی اپنے غیر معمولی کارکردگی کی وجہ سے شہرت حاصل کر چکی ہے، اور یہ وعدہ ٹیم کو مزید طاقت فراہم کرے گا تاکہ وہ کامیابی کی جانب گامزن رہے۔
بی ایس ایل کے میچز پہلے ہی عوامی توجہ کا مرکز بن چکے ہیں، اور جاوید خان تھاکوٹ کی جانب سے کوزہ بانڈہ یونائیٹڈ کیلئے پی سی ہوٹل میں دعوت کا اعلان اس ٹورنامنٹ کو مزید یادگار بنا دے گا۔ بی ایس ایل انتظامیہ نے بھی اس خبر کا خیرمقدم کیا ہے اور امید ظاہر کی ہے کہ یہ اعلان ٹیم کے حوصلے بلند کرنے میں اہم کردار ادا کرے گا۔
